මුලාවේ වැටෙන්නේ නැතිව ආදායමට හරියටම ගැළපෙන, ක්‍රෙඩිට් කාඩ්පත තෝරා ගන්නේ කොහොමද..?

ක්‍රෙඩිට් කාඩ්පතක් පාව්චිචි කරනවා කියන්නේ දැලි පිහියෙන් කිරි කනවා වගේ වැඩක්..ක්‍රෙඩිට් කාඩ් පතක් තෝරා ගැනීමේදී එහි ඇතුළත් සියලුම පහසුකම් පිළිබඳව අවධානය යොමු කළ යුතුමයි. ඒ වගේම ඒවායේ යම් යම් සැඟවුණු ගාස්තු අයකිරීම් වැනි වංචනික ක්‍රියා සිදුවෙනවාද කියලත් හොයලා බැලීම වටිනවා. කේ‍රඩිට් කාඩ්පත ඔබට වාසිදායක වීමට නම් වාර්ෂික ගාස්තු ගෙවීමකින් තොර හෝ අවම වාර්ෂික ගාස්තුවක් අය කෙරෙන කේ‍රඩිට් කාඩ් සැපයෙන ආයතන වෙත වැඩි නැඹුරුවක් යොමු කළ යුතු වෙනවා.

ක්‍රෙඩිට් කාඩ් භාවිතය ගැන පුංචි සටහනක් තබන්නයි මම සූදානම් වෙන්නේ.
“අ‍පෝ.. ක්‍රෙඩිට් කාඩ්? මතක් කරන්නවත් එපා” ඇතැම් විට ඔබ එහෙම කියයි.

“අපි දන්න කියන කී දෙනෙක් ඔය ක්‍රෙඩිට් කාඩ් නිසා නැති නාස්තිවෙලා ගියාද?” තවත් කෙනෙක් එහෙම කියයි. ඇත්ත. ක්‍රෙඩිට් කාඩ් කියන්නේ දැලි පිහියෙන් කිරි කනවා වගේ වැඩක්. ඒත් හොඳ අවබෝධයක් ඇතිව, හොඳ සිහියෙන් කනවා නම්, කිරි කන්න දැලි පිහියත් හොඳයි

“ණයපත්” ඔබේ වාසියට හරවා ගන්නේ කොහොමද? ඒ තුළින් ජීවිතය පහසු කර ගන්නේ කොහොමද යන කාරණා ගැන ඔබ දැනුවත් කරන්නට අපි කල්පනා කළා. ණයපත් භාවිතය පිළිබඳව දෙගිඩියාවෙන් සිටින අයට ඒ සැක සංකා දුරුකර ගන්නටත්, කේ‍රඩිට් කාඩ් නිසා අමාරුවේ වැටිලා ඉන්න උදවියට, ඒ වළෙන් ගොඩට එන්නත් අපේ මේ පුංචි ලිපිය ලොකු උපකාරයක් වෙනවා නොඅනුමානයි.

ක්‍රෙඩිට් කාඩ්පතක් මිලදී ගැනීමට පෙර, ආයතන කිහිපයක් වෙත ගොස් කරුණු තොරතුරු විමසා බැලීම පළමුව කළ යුතුයි. මොකද ක්‍රෙඩිට් කාඩ් සම්බන්ධව විවිධ මූල්‍ය ආයතන ලබා දෙන පහසුකම්, ‍පොලී අනුපාත, ණය කාලසීමා ආදිය එකිනෙකට වෙනස් වනවා. ආයතන කිහිපයකට ගොස් ඒ ඒ අයගේ පැකේජයන් පිළිබඳව විස්තර සොයා ගැනීම තුළින් ඔබේ ජීවන රටාවට වඩාත්ම සුදුසු ණයපත තෝරා ගැනීමට ඔබට හැකියාව ලැබෙනවා.

කේ‍රඩිට් කාඩ් පතක් තෝරා ගැනීමේදී එහි ඇතුළත් සියලුම පහසුකම් පිළිබඳව අවධානය යොමු කළ යුතුමයි. ඒ වගේම ඒවායේ යම් යම් සැඟවුණු ගාස්තු අයකිරීම් වැනි වංචනික ක්‍රියා සිදුවෙනවාද කියලත් හොයලා බැලීම වටිනවා. කේ‍රඩිට් කාඩ්පත ඔබට වාසිදායක වීමට නම් වාර්ෂික ගාස්තු ගෙවීමකින් තොර හෝ අවම වාර්ෂික ගාස්තුවක් අය කෙරෙන කේ‍රඩිට් කාඩ් සැපයෙන ආයතන වෙත වැඩි නැඹුරුවක් යොමු කළ යුතු වෙනවා. මෙය සුළු කාරණයක් වන්නට පුළුවන්. ඒත් මහන්සියෙන් උපයන ධනය, නිරපරාදේ නාස්ති කර ගැනීමෙන් වළකින්නට නම් එවැනි කාරණා ගැන සැලකිලිමත් වීම වැදගත් වෙනවා.

ඇතැම් මූල්‍ය සමාගම් ඉතාම ආකර්ෂණීය පහසුකම් සමග වටිනා වාසි රැසක් ගනුදෙනුකරුවන් වෙත ලබා දෙනවා යැයි කියමින් වෙළෙඳ ප්‍රචාරණ සිදු කරන අයුරු අප දකිනවා. ඒත් ඒ පහසුකම් පිටුපස ඇති ‍පොලී අනුපාතය ඇසූ විට ඔබට දවල් තරු පෙනෙන්නට පුළුවන්. බොහෝ විට වෙළෙඳ ප්‍රචාරණය පිටුපස තිබෙන්නේ මායාව, ‍ප්‍රෝඩාව සහ මවාපෑම පමණයි.

හරි, ඔබ දැන් ඔබට සුදුසු කේ‍රඩිට් කාඩ්පත තෝරා ගත්තා යැයි සිතමු. ඔබේ යහපත පිණිස එය ඥානාන්විතව භාවිත කළ හැක්කේ කොහොමද යන්න පිළිබඳව මෙවැනි පුංචි ඉඟි කිහිපයක් සපයන්න අපට පුළුවන්.

සාමාන්‍යයෙන් පුංචි පුංචි ගාස්තු ගෙවීම් සඳහා ක්‍රෙඩිට් කාඩ්පත භාවිත කිරීම එතරම් ලාභදායී නැහැ. නිවසට අවශ්‍ය මාසික බඩු ලැයිස්තුව ආදී ඉහළ ගාස්තු ගෙවීමකදී ක්‍රෙඩිට් කාඩ්පත භාවිත කිරීම සුදුසුයි. මෙහිදී ඔබේ ණය සීමාව පිළිබඳව සැලකිලිමත් විය යුතුයි. එනම් ණය සීමාවෙන් 50ක් හෝ එම අගය ඉක්මවා නොයන ලෙස කේ‍රඩිට් කාඩ්පත භාවිත කරන්න. එය වඩාත් නුවණට හුරුයි. මෙය තවදුරටත් ඔබට පහසුවක් වීමට නම් මාසය අවසානයේදී කේ‍රඩිට් කාඩ් බිල්පත සම්පූර්ණයෙන් ගෙවා දමීමේ සීමාව දැන ඒ ප්‍රමාණයෙන් පමණක් වියදම් කිරීමට වගබලා ගත යුතුයි.

ක්‍රෙඩිට් කාඩ් භාවිතයේදී ඔබට ලැබෙන තවත් වාසියක් නම් ඔබට අත්‍යවශ්‍ය වූ වටිනා භාණ්ඩයක් මාසික වාරික වශයෙන් ගෙවීමේ ක්‍රමයට ලබා ගැනීමේ හැකියාවයි. බොහෝ ආයතන මේ පහසුකම දැන් සලසා දෙනවා. මෙහිදී ‍පොලී රහිතව වාරික ගෙවීමේ ක්‍රමයට බඩු බාහිරාදිය ලබා ගත හැකි අවස්ථාවන් ගැන වැඩි සැලකිල්ලක් දැක්විය යුතුයි.

වැඩි වටිනාකමකින් යුතු භාණ්ඩයක් මිලදී ගැනීමේදී ඔබේ අයවැය චක්‍රය අවුල් නොවෙන ලෙස, නිසි මූල්‍ය කළමනාකරණයක් සඳහා මෙම ක්‍රමය ඉවහල් වෙනවා.

කේ‍රඩිට් කාඩ් භාවිත කරමින් බඩු මිලදී ගන්නවාට අමතරව අතට මුදල් ද ගන්නා අය අප දකිනවා. මෙය එතරම් සුදුසු දෙයක් නම් නොවෙයි.

නමුත් අතට මුදල් ගත යුතුම අවස්ථාවක් එළැඹෙනවා නම් එකවර ඒ මුදල ලබා ගැනීම හොඳයි. එසේ නොමැතිව කිහිප වාරයකින් මුදල් ලබා ගැනීමේදී අමතර විශාල මුදල් ප්‍රමාණයක් ඔබට අහිමි වෙනවා. කේ‍රඩිට් කාඩ්පතකින් මුදල් ලබා ගැනීමේදී ඔබට ඉහළ ‍පොලියක් ආපසු ගෙවීමට සිදුවෙනවා. මේ සියලු එකතුවීම් මාසය අවසානයේ ඔබේ කේ‍රඩිට් කාඩ් බිල්පතට එකතු වන බව සිහියේ තබා ගන්න.

දකින දකින බඩු භාණ්ඩ මිලදී ගන්න, කේ‍රඩිට් කාඩ්පතෙන් ‘සුද්දා වගේ’ වියදම් කරන උදවිය අපි දැක තිබෙනවා. ඒත් බොහෝ විට ඒ අය ආයතන කිහිපයකට ණයකාරයන් බවට පත් වී හමාරයි. මේ නරක පුරුද්ද ඇති උදවිය දවසින් දවස ඇදවැටෙනවා මිස, කිසිම දවසක ගොඩ එන්නේ නම් නැහැ. මේ නිසා කේ‍රඩිට් කාඩ්පතෙන් භාණ්ඩයක් මිලදී ගන්නට පෙරාතුව “මේ දෙය මට අත්‍යවශ්‍යමද?” යැයි දෙතුන් වතාවක් ඔබෙන්ම ප්‍රශ්න කරන්න. අත්‍යවශ්‍ය දෙයක් නොවෙයි නම් වහාම ඒ වියදම කපා හරින්න. ස්වයං විනයක් ඇතිව වෙළෙඳ‍පොළේ බඩු මිලදී ගන්න. හදවතට වහල් වෙලා වියදම් කරලා ලෝකෙට ණයකාරයෙක් වෙන්න එපා.

මාසය අවසානයේ ක්‍රෙඩිට් කාඩ් බිල්පත සම්පූර්ණයෙන් ගෙවා දැමීමට බොහෝ දෙනකු අ‍පොහොසත් වන්නේ ප්‍රමාණය ඉක්මවා කේ‍රඩිට් කාඩ් භාවිත කිරීම නිසයි. වියදමක් සඳහා කේ‍රඩිට් කාඩ්පත අතට ගන්නා සෑම මොහොතකදීම මෙයින් මම ණයකාරයකු වනවා” යැයි තමන්ටම මුමුණා ගන්න.

ක්‍රෙඩිට් කාඩ් භාවිත කරන බොහෝ උදවිය මාසය අවසානයේ ක්‍රෙඩිට් කාඩ්පතෙහි සම්පූර්ණ මුදල ගෙවා දමන්නේ නැහැ. ඔවුන් බොහෝ දෙනකු මාස කිහිපයක් ඇතැම් විට අවුරුද්දකටත් වැඩි කාලයක් මේ ආකාරයේ නොගෙවූ ශේෂයක් පවත්වා ගන්නවා. නමුත් ඔබ දන්නවාද, මාසයෙන් මාසය, ඒ ‍පොලියටත් නැවත ‍පොලියක් එකතු වන බව? ‍පොලියට තවත් වරක් ‍පොලිය අයකිරීම වැල් ‍පොලිය යැයි හඳුන්වන්නට පුළුවන්. මේ අනුව ආයතන ‘වැල් ‍පොලිය’ අය කරන විට ‘වැල් ණයකාරයකු’ වෙනවා. දිගටම එහෙම ගියොත් වැ‍ලේ වැල් නැතිව යනවා.

මුලින් අවම ශේෂය ගෙවා දමා වැඩිපුර මුදලක් ගිණුමේ ඉතිරි කරන්න. ඔබට අනවශ්‍ය භාණ්ඩයක් විකුණා දැමීමෙන්වත් බිල්පතේ ශේෂය සම්පූර්ණයෙන් ගෙවා දමන්න. ඉන් අනතුරුව ශේෂය තවදුරටත් ඉදිරියට ඉතිරි නොවන ලෙස කටයුතු කරන්න.

දැලි පිහියෙන් කිරිකන නිවැරදි ක්‍රමය අපි ඔබට කියා දුන්නා. දැලි පිහියෙන් කිරි කාලා බඩගිනි නිවා ගන්නවාද, වැරදියට එය පාවිච්චි කරලා, දිව කපා ගන්නවාද, නැත්නම් කිරි නොකාම ඉන්නවාදැයි තීරණය කරන්නට පුළුවන් ඔබටම තමයි.

හරිනි මංචනායක.

Facebook Comments

more recommended stories

%d bloggers like this: