Ape Rata | අපේ රට | News Sri Lanka | Latest News Sri Lanka | Braking News Sri Lanka| Gossip Sri Lanka – අපක්ෂපාතී වාර්තාකරණයේ පෙරගමන්කරු

Latest News:

අභියෝග වලට භය නෑ – මත්ජාවාරම්කරුවන්ට එරෙහි මරණ දඬුවම අනිවාර්යයි..!                 මියැදෙන්නට සිටි බලු පැටියෙකු සුවපත් කල බන්ධනාගාරයේ උතුම් මිනිස්සු..!                 ගාලු ක්‍රීඩාංගණයට කරන්න යන දේ දැක රංගන හේරත්ගෙන් සංවේදි කතාවක්..! (VIDEO)                 ලේ ලබා දී දරුවන් සහ මව්වරුන් මිලියන 2.4 කට පිහිට වූ ඕස්ට්‍රේලියානුවා                 ලංකාවෙන් ගිහින් බුකර් සම්මානය දිනා ලෝකෙන්ම එක වුණු මයිකල් ඔන්ඩාච්චි.                 රාජපක්ෂලා ගෙන් අල්ලස් ගත් බ්‍රිතාන්‍ය මන්ත්‍රී දින 30ක් ගෙදර..!!=                 විවෘත රාජ්‍ය හවුල්කාරිත්වයේ නායක හමුවට ප්‍රථම වරට අපේ රට එක්වෙමින් ජනාධිපති ලොවට කියු දේ..!                 මීගලෑව උඩු යටිකුරු කළ රටක් වටින OIC මහත්තයා (PHOTOS)                

2020 ජනාධිපතිවරණයට එන හැටි ජනාධිපති මෛත්‍රී කිව්ව හැටි..! (VIDEO)

සමහරු මගෙන් අහනවා 2020 දී විශ්‍රාම යනවාද කියලා . සමාජ වෙබ් අඩවි වලත් ඒක යනවා. ඒත් මට 2020 විශ්‍රාම යන්න කලින් කරන්න වැඩ බොහෝමයක් තියෙනවා. යැයි ජනාධිපති මෛත්‍රීපාල සිරිසේන මහතා පැවසීය

මඩකලපුව චෙන්කලඩි ක්‍රීඩාංගණයේ පැවැත්වෙන ශ්‍රීලංකා නිදහස් පක්ෂ මැයි රැලිය අමතමින් ජනාධිපති මෛත්‍රීපාල සිරිසේන මහතා මේ බව පැවසීය.
වැඩිදුරත් අදහස් දක්වමින් ජනාධිපතිවරයා මෙසේද සඳහන් කළේය.

අවංක දේශපාලනඥයෝ ලංකාවේ කීයක් ඉන්නවද? හොරකම් කරපු නැති කී දෙනෙක් ඉන්නවද? සමහරු 2020 දී බලයට එන්න හීන දකිනවා. ඒත් නිසි වැඩපිළිවෙලක් නැහැ.

මේ අය රටේ දුප්පත් ජනතාවගේ හැගීම් තේරුම් ගන්න ඕනි. දේශපාලන නාඩි වැටෙන හැටි තේරුම් ගන්න ඕනි .සුරංගනා ලෝක ගැන ගොඩක් දෙනාට කතා කරන්න, හීන දකින්න පුළුවන්. දුප්පත් ජනතාව ගැන ඒ අයට කැක්කුමක් නෑ. ශ්‍රී ලංකා නිදහස් පක්ෂය ඉදිරියේදී ජාතික සමගිය සංහිදියාව ඇති පැහැදිලි වැඩපිළිවෙලක් ඇතිව ඉදිරියට එනවා. ඒ අලුත් වැඩපිළිවෙළට සහය දෙන ලෙස ඔබ සැමගෙන් ඉල්ලා සිටිනවා.‘

එමෙන්ම මෙහිදී ජනාධිපතිවරයාගේ කථාව තුළ ගැබ්ව තිබූ එක් වැදගත් මාතෘකාවක් වූයේ බෞද්ධ සමාජයේ භික්ෂු සමාජය පෙරටු කොටගත් විනයානුකූල සමාජයක් ගොඩ නැංවීම පිළිබඳවයි..

020 දි විශ්‍රාම නොන්නා බවත් රටට සිදුකිරිමට තවත් විශාල වැඩකොටසක් ඇති බවත් ජනාධිපතිවරයා මෙහිදි සඳහන් කලා. හොරුන් සහ මිනිමරුවන් නොමැති අලුත් දේශපාලන වැඩපිළිවෙක අවශ්‍යතාව අවධාරනය කල ඔහු දේශපාලන හොරු තක්කඩීන් සහ වංචාකරයින් රටට අවශ්‍ය නොමැති බව පෙන්වා දුන්නා.

මිනිසුන්ට ආදරය කරන දේශපාලනඥයින් රටට අවශ්‍ය වන අතර උරුමන් රැක ගන්නා දේශපාලනඥයින් බිහිකර ගන යුතු යැයි ඔහු කියා සිටියා.

පක්ෂ ප්‍රතිසංවිධාන වැඩපිළිවල ඔස්සේ ශ්‍රි ලංකා නිදහස් පක්ෂය ජනතාවාදි පක්ෂයක් ලෙස ඉදිරියට ගෙන යන බවත් සඳහන් කල. තම පක්ෂය මධ්‍යගත ප්‍රජතන්ත්‍රවාදය ඔස්සේ ගොඩනගමින් ශක්තිමත් කරන බවත් කියා සිටියා. වැඩකරණ ජනතාවට ඒ සඳහා එක්වන ලෙස තමා ආයාචනා කරන බවයි ජනාධිපති සඳහන් කලේ.

යුද්ද අවසන්වි දස වසරක් ගතවි ඇතත් පස්චාත් යුද සමයේදී ඉටුකලයුතු වගකිම් රැසක් ඉතිරිව තිබෙනවා. ඉන් වගකීම් බහුතරයක් තම විසින් ඉටුකර තිබෙන බව ඔහු කියා සිටියා. ජාතික සහාජීවනය ඇති කර, රට ඉදිරියට ගෙන යන විට ඇතැම් පුද්ගලයින් ඒ දෙස උපහාසයෙන් සහ අපහාසයෙන් බලන බව ජනාධිපතිවරයා කියා සිටියා. උතුරු නැගෙනහිර තුවක්කු අතට ගන්නා යුගය අවසන් කළ යුතු බව කියා සිටියා.

ශ‍්‍රී ලංකා නිදහස් පක්ෂ මැයි දින රැළිය අමතා ශ‍්‍රී ලංකා නිදහස් පක්ෂයේ සභාපති ජනාධිපති ගරු මෛතී‍්‍රපාල සිරිසේන මැතිතුමා කරන ලද සම්පූර්ණ කථාව.

“මම ඉතාමත් සතුටු වෙනවා මේ වසරේ ශ‍්‍රී ලංකා නිදහස් පක්ෂයේ ජාතික කම්කරු සමරුව අද මඩකලපුවේදි පැවැත්විමට ලැබීම ගැන. අපි අද එක්වී සිටින්නේ අපේ රටේ වගේම ලෝකයේම වැඩකරන ජනතාවට, කම්කරු ජනතාවට අපේ ගෞරවය පුද කිරීම සදහා. විශේෂයෙන්ම අපේ සියලූම වෘත්තීය සමිති අද අපි සමග එක්වී මෙම වැඩසටහන සාර්ථක කිරීමට ඒ සියලූදෙනා දැක්වු සහයෝගය මම විශේෂයෙන් සිහිපත් කරනවා.

මැයි දිනය වෙන් කර තිබෙන්නේ ලෝකයේ වැඩ කරන ජනතාව වෙනුවෙන්. විශේෂයෙන් ඔවුන්ගේ අයිතිවාසිකම් වරප‍්‍රසාද සමග ඔවුන්ව සිහිපත් කිරීම, සැමරීම වගේම එම අයිතිවාසිකම් ලබාදීම සදහා සියලූදෙනාගේ අවධානය යොමුවීම සදහායි. මේ රටේ වැඩකරන ජනතාවට, කම්කරු ජනතාවට සෑම විටම අයිතිවාසිකම්, වරප‍්‍රසාද ලබා දුන්නේ ශ‍්‍රී ලංකා නිදහස් පක්ෂ ආණ්ඩු විසිනුයි.

ඒ වගේම ගෙවී ගිය අවුරුදු තුන හමාරක කාලය තුළ අපේ රජය මේ රටේ වැඩකරන ජනාතවට, කම්කරු ජනතාවට දීමනා වැඩිකිරීම් ප‍්‍රමුඛම අයිතිවාසිකම් රාශියක් ලබාදුන්නා. අද ලෝකයේ සෑම රටකම කම්කරු සටන්වලදි ,සියලූ කම්කරුවනි එක්වෙව්, කියලා ඒ සටන්කාමිත්වය තුළ හඩගා කියනවා. මැයි පළමුවැනිදා ජාත්‍යන්තර කම්කරු දිනය වුවත් අද දවස ඒ සදහා යොදාගත්තේ ඇයි කියන කාරණය ඔබ සෑමකෙනෙක්ම දන්නවා. ඒ නිසා මම ඒ ගැන කතා කරන්නේ නැහැ.
අපිට මේ රටේ කම්කරු ජනතාව, වෘත්තීය සමිති ව්‍යාපාරය ඉතමත් වැදගත් වෙනවා ජාතික සමගිය ගොඩනැගීමේදී. විශේෂයෙන්ම ඔබ අප කවුරුත් දන්නවා අපි අවුරුද 30 කට ආසන්න කාලයක් ඉතාම දරුණු ඒවගේම ඛේදනීය යුද්ධයකට මුහුණ දුන්නා. ඒ යුද්ධයේදී සිංහල, දෙමළ, මුස්ලිම් සෑම කොටසකගේමම ජීවිත හානි සිදුවුණා. සෑම ජාතියකම නායකයින් මරණයට පත්වුණා.

ඒ වගේම අපේ ආරක්ෂක හමුදා, ති‍්‍රවිධ හමුද, පොලිසිය සහ සිවිල් ආරක්ෂක අංශයේ විශාල පිරිසක් මිය ගියා. ඒ යුද්ධයේ අත්දැකීම් සමග අපි සෑම කෙනෙක්ම වගකීමෙන් කටයුතු කරමින් නැවත මේ රටේ යුද්ධයක් ඇතිවීම වළක්වන්න ඕන. එහිදී වෘත්තීය සමිති ව්‍යාපාරවලට, කම්කරු පංතිවලට විශාල වගකීම් සහ යුතුකම් රාශියක් තිබෙනවා. ජාතික සමගිය ගොඩනැගමේදී විශේෂයෙන්ම ජාතින් අතර සුහදභාවය, මිත‍්‍රශීලිභාවය ගොඩනැගීමේදී කම්කරු ව්‍යාපාරයට, වෘත්තිය සමිති ව්‍යාපාරයට කළහැකි මෙහෙය ඉතාමත් විශාලයි කියන එක මම මෙහිදී සදහන් කරන්න ඕන.

අපි අවුරුදු 30ක යුද්ධයෙන් පසු පශ්චාත් යුද සමයකට මුහුණ දුන්නා. යුද්ධය අවසන් වී දැන් අවුරුදු 10කට ආසන්නයි. පසුගිය අවුරුදු තුන හමාරක කාලයේ විශේෂයෙන් මේ රටේ පශ්චාත් යුද සමයක කළයුතු වගකීම් හා යුතුකම් රාශියක් අපි ඉටුකළා. ජාතින් අතර සමගිය ගොඩනැගීම සදහා. මේ රටේ සෑම ජන කොටසකටම සැකයෙන් බියෙන්, අවිශ්වාසයෙන් තොරව ජීවත්වීමේ අයිතිය අපි තහවුරු කරලා තිබනෙවා. ජාතික සංහිදියව ශක්තිමත් කිරීමට විශාල කැපකිරීමක් අපේ රජය කරලා තිබෙනවා. අපි ජාතික සංහිදියාව ගොඩනගන්න, සමගිය ගොඩනගන්න කරන ලද බොහෝ වැඩසටහන් ඇතැම් දේශපාලන අන්තවාදීන් අපහාසයෙන් සහ උපහාසයෙන් විග‍්‍රහ කළා. පෙන්නුම් කළා.

මේ රටේ නැවත යුද්ධයක් ඇතිවීම වැළැක්වීම සදහා සියලූ ජාතින් අතර විශ්වාසය ඇති කරන පැහැදිළි වැඩපිළිවෙළක් කි‍්‍රයාත්මක කිරීමට අපි තවමත් අසමත් වෙලා තිබෙනවා. යුද්ධයෙන් තුවක්කුවලින් ප‍්‍රශ්න විසදන්න බැහැ. මනුෂ්‍යත්වයෙන් මිනිස්කමෙන් ප‍්‍රශ්න විසදන්න ඕන. ඒක තමයි දියුණු සමාජයක ලක්ෂණ. ඒ සදහා අපි සෑම කෙනෙක්ම කැප වෙන්න ඕන. දේශපාලන පක්ෂ අවංකභාවයෙන් කටයුතු කරන්න ඕන.

ඒ අවංකභාවය පැහැදිළිව කි‍්‍රයාවෙන් පෙන්නන්න ඕන. බලය ලබාගන්නා පුලුවන්. බලය ලබාගන්න අද සමහර අය බොහෝ ජනතාව දේවල් පෙන්නුම් කරනවා . බලය ලබා ගැනීමේ සිහිනවල බොහෝ අය ඉන්නවා. නමුත් මේ රටේ ජාතික සමගිය ගොඩනැගීම පිළිබද ඇතිවී තිබෙන ගැටලූව විසදීමට අවංක කැපවීමක් දේශපාලන නායකයින් කී දෙනෙකුගේ තිබෙනවද කියලා මම අහනවා.

මේ ප‍්‍රශ්න පැහැදිළි ලෙසම “අලු යට ගිනි” වගේ තිබෙන්නේ. මේ රටේ විශේෂයෙන්ම උතුරු නැගෙනහිර වේවා, දකුණේ වේවා තරුණයින්ට නැවත තුවක්කුව අතට ගැනීමට සිදුවන යුගය වැළැක්විය යුතුයි අපි. දේශපාලන බලය බලාපොරොත්තු වන අය මේ සදහා වැඩපිළිවෙළක් ඉදිරිපත් කරලා නැහැ. අපේ වර්තමාන රජය වැඩපිළිවෙළවෙල් රාශියක් ඉදිරිපත් කළා. ඒවා කි‍්‍රයාත්මක කළා. ඒවායේ අඩු පාඩුකම් තිබෙනවා. ඒ නිසා එම වැඩසටහන් තව ශක්තිමත්කර ගැනීම අවශ්‍ය වෙනවා.

ඒ නිසා මේ රටට ආදරයක් තිබෙන සෑම දේශපාලන පක්ෂයක්ම, සෑම දේශපාලන නායකයෙක්ම මේ රටේ ජාතික සමගිය ස්ථීරසාර කිරීම සදහා අවංකව කැප වෙන්න ඕන. ඒ කැපවීම පෙන්නුම් කරන්න ඕන. අපි රට වෙනුවෙන් වගකීමෙන් කටයුතු කරන්න ඕන. බලය නැති අයට ඕන දෙයක් කියන්න පුලුවන්. නමුත් මේ ප‍්‍රශ්නවල තිබෙන බැරූරුම්කම සෑම කෙනෙක්ම තේරුම් ගන්න ඕන.
මේ රටේ සියලූ කම්කරු ජනතාවට, වැඩ කරන ජතාවට, වෘත්තීය සමිති ව්‍යාපාරවලට අපි ගෞරවයෙන් ආරාධනා කරන්නේ ජාතික සමගිය ගොඩනැගීමේ ඒ වැඩපිළිවෙළට එක්වෙන්න කියලා. පොදු ජනතාවගේ සාමාන්‍ය ජනතාවගේ ප‍්‍රශ්න රාශියක් තිබෙනවා. ඒවා විසදීම සදහා අපි පසුගිය වසර තුන හමාරේ සෑහෙන වැඩකොටසක් කළා.

මේ ප‍්‍රදේශයේ ජනතාවගේ ප‍්‍රශ්න ගැන අද කතා කළා. මේ ඇමතිවරු නියගය ගැන කතා කළා. මේ නියගය දැන් අවුරුදු තුන හමාරකට වැඩියි. මේ නියගය අපිට වඩා පාකිස්ථානයේ තිබෙනවා. මේ නියඟය අපිට වඩා ඉන්දියාවේ තිබෙනවා. මේ කලාපයේ රටවල් ගණනාවක් මේ නියඟයට මුහුණ දී තිබෙනවා. අපි මිනිස්සු විදියට ස්වභාව ධර්මයා සමග සටන් කළයුතුයි. ලෝක ඉතිහාසයේ මිනිසුන් ඉදිරියට ඇවිල්ලා තිබෙන්නේ ස්වභාව ධර්මයා සමග සටන් කරලා. ඒ දැනුමෙන්, බුද්ධියෙන් අත්දැකීම්වලින්. ඒ නිසා අපි සෑම කෙනෙක්ම එකට එක්වෙන්න ඕන දැනුමෙන්, බුද්ධියෙන් සහ අත්දැකිම්වලින් මේ ප‍්‍රශ්න විසදන්න. සෑම දේශපාලනඥයෙක්ම අවංක වෙන්න ඕන. බලයෙන් පමණක් ජනතාව රවටන්න හොද නැහැ.

සමහර අය බලාපොරොත්තු වෙනවා බලය ගන්න වැඩපිළිවෙළක් නැතුව. ඒ නිසා ශ‍්‍රී ලංකා නිදහස් පක්ෂය බලාපොරොත්තු වෙනවා පසුගිය කාලයේ ලැබූ මේ අත්දැකීම් සමග ජනතාවට අලූත් වැඩපිළිවෙළක් ඉදිරිපත් කරන්න. සමහර අය මගෙන් අහනවා මම 2020 විශ‍්‍රාම යනවද කියලා. මේ දවස්වල සමාජ වෙඞ් අඩවිවල යනවා 2020 මම විශ‍්‍රාම යනවා කියලා. මම 2020 විශ‍්‍රාම යන්නේ නැහැ, කරන්න වැඩ හුගක් තිබෙනවා. මේ රටේ අවංක දේශපාලනඥයින් කී දෙනෙක් ඉන්නවද කියලා මම අහනවා. හොරකම් කරපු නැති මිනී මරපු නැති කී දෙනෙක් ඉන්නවද කියලා මම අහනවා. අපිට අවශ්‍ය අලූත් වැඩපිළිවෙළක්. ඒ වැඩපිළිවෙළට දේශපාලන හොරු අවශ්‍ය නැහැ. දේශපාලන තක්කඩි අවශ්‍ය නැහැ. මිනිමරපු මිනිස්සු අවශ්‍ය නැහැ. දූෂිතයින් අවශ්‍ය නැහැ. වංචාකාරයින් අවශ්‍ය නැහැ. මිනිසුන්ට ආදරය කරන දේශපාලන නායකයින් අවශ්‍යයි මේ රටට. අද සමහර අය සිහින මවනවා 2020 අලූත් ආණ්ඩු හදන්න. මම දැක්කා අපේ ආණ්ඩුවෙත් සමහර අය 2020 ගැන කතා කරනවා. ඒ හිටපු අයටයි, ඉන්න අයටයි ඔක්කොටම කියනවා මේ රටේ අවංක දේශපාලනඥයින් විදියට ඒ සදහා සුදුසු අය එකතු වෙන්න කියලා.

ජාතික සමගිය ගොඩනගන්න වැඩපිළිවෙළක් තියෙන්නේ කොතනද එතන අපි ඉන්නවා. මේ රටේ දුප්පත්කම නැති කරන්න වැඩපිළිවෙළ කොතනද එතන අපි ඉන්නවා. නොයක් අය නොයෙක් සිහින දකින්න පුලුවන්. මේ රටේ තරුණ පරපුරේ අනාගතය ගොඩනගන්න වැඩපිළිවෙළක් තියෙන්නේ කොතනද එතන අපි ඉන්නවා. මේ රටේ උගතුන්ට බුද්ධිමතුන්ට හොඳ සමාජයක් හදන්න ඒකරාශි වීමක් තිබෙන්නේ කොතනද එතන අපි ඉන්නවා. ඒ නිසා අපි කවුරුත් මේ සියලූ කටයුතුවලදි අවංක වෙන්න ඕනෑ. සුරංගනා ලෝක ගැන කතා කරන්න පුලුවන්. නොයෙක් අය නොයෙකුත් සිහින දකින්න පුලුවන්. ඔය සුරංගනා ලෝක දකින අයත් සිහින දකින අයත් මේ රටේ දුප්පත් අහිංසක ජනතාවගේ ප‍්‍රශ්න ගැන අවංක කැපවීමක් නැහැ කියලා මම පැහැදිලිව කියනවා.

මේ අහිංසක දුප්පත් ජනතාවගේ හෘද සාක්ෂිය තේරුම් ගන්න ඕනෑ. දේශපාලන නාඩි වැටෙන හැටි තේරුම් ගන්න ඕනෑ. මිනිසුන්ගේ දුක් ගැනවිලි තේරුම් ගන්න ඕනෑ. අපේකම අපේ දේ රැකගන්න ඕනෑ. දේශීයත්වය රැක ගන්න ඕනෑ. අපේ සංස්කෘතිය රැක ගන්න ඕනෑ. අපේ උරුමයන් රැක ගන්න ඕනෑ. මේ රටේ බෞද්ධ භික්ෂු සමාජය ශක්තිමත් කරන්න ඕනෑ. ආරක්ෂා කරන්න ඕනෑ. මේ රටේ හින්දු, ඉස්ලාම්, ක‍්‍රිස්තියානි සමාජය ශක්තිමත් කරන්න ඕනෑ.

මේ රටේ සිංහල බෞද්ධ ජනතාවගේ ප‍්‍රශ්න මොනවද කියලා තේරුම් ගන්න ඕනෑ. මේ රටේ ඉස්ලාම් ජනතාවගේ ප‍්‍රශ්න මොනවද කියලා තේරුම් ගන්න ඕනෑ. මේ රටේ හින්දු ජනතාවගේ දෙමළ ජනතාවගේ ප‍්‍රශ්න තේරුම් ගන්න ඕනෑ. ඒ ප‍්‍රශ්නවලින් ලිස්සලා යන්න දේශපාලනඥයින්ට පුලුවන්කමක් නැහැ. ආණ්ඩු කරන අයත් ආණ්ඩු හදන්න බලාපොරොත්තු වන අයත් මේක පැහැදිලිව තේරුම් ගන්න ඕනෑ. ඒ නිසා මේ ඓතිහාසික කම්කරු රැළියේදි මම කියනවා ඒ අවංක කැපවීම් සහිත ජාතියේ අනාගතය සඳහා වූ වැඩපිළිවෙළක් වෙනුවෙන් ශ‍්‍රී ලංකා නිදහස් පක්ෂය ශක්තිමත් කරමින් සියලූදෙනා ඒකාරාශී වෙමුයි කියලා මා ආයාචනය කරනවා.

අපිට මේ රට හදන්න ජාත්‍යන්තරයෙන් හොඳ සහයෝගයක් තිබෙනවා. අපිට ලෝකයේ සෑම රාජ්‍යයක්ම අද සලකනවා. අපිව විශ්වාස කරනවා. ඒ විශ්වාසයෙන් අපි රටට වැඩක් කර ගන්න ඕනෑ. ජාත්‍යන්තරය අප කෙරෙහි තබා ඇති විශ්වාසයෙන් මේ රට ගොඩනගන්න ඕනෑ. ඒ විශ්වාසය තුළින් මේ රට සංවර්ධනය කරන්න ඕනෑ. මේ රටේ ජනතාවගේ ප‍්‍රශ්න විසඳන්න ඕනෑ. ඒ නිසා දේශපාලනඥයෝ බොරු කරන්නේ නැතිව අවංකව වැඩ කරන්න ඕනෑ. හොරු දූෂිතයෝ කව්ද කියලා මුලු රටම දන්නවා.

මේ රටට අද අවශ්‍ය වන්නේ අවංක කැපවීම සහිත සාමූහික පිරිසක්. ශ‍්‍රී ලංකා නිදහස් පක්ෂය පැහැදිලි පිරිසිදු වැඩපිළිවෙළක් රටට ඉදිරිපත් කරනවා. සමහර අය කියනවා අපි දුර්වල වෙලා කියලා. නැහැ අපි දුර්වල වෙලා නැහැ. ශ‍්‍රී ලංකා නිදහස් පක්ෂය පාර්ලිමේන්තුවේ ආසන 07 ට බැහැපු වෙලාවල් තිබුණා. ශ‍්‍රී ලංකා නිදහස් පක්ෂය තුනට හතරට කැඩිච්ච වෙලාවලූත් තිබුණා. මේ රටේ සෑම දේශපාලන පක්ෂයකටම ඒ අත්දැකීම තිබෙනවා. ශ‍්‍රී ලංකා නිදහස් පක්ෂය අලූත් වැඩපිළිවෙළක් රටට හඳුන්වා දෙනවා. රට ගොඩනගන දේශපාලන වැඩපිළිවෙළක් හඳුන්වා දෙනවා. පක්ෂයේ අලූත් ප‍්‍රතිසංවිධාන වැඩපිළිවෙළක් හඳුන්වා දෙනවා. පක්ෂය සම්පූර්ණයෙන්ම ජනතාවාදී පක්ෂයක් බවට පත් කරනවා. ශ‍්‍රි ලංකා නිදහස් පක්ෂයේ මධ්‍යගත ප‍්‍රජාතන්ත‍්‍රවාදී බවක් ඇති කරනවා. ඒ තුළ ශක්තිමත් දේශපාලන ව්‍යාපාරයක් ආරම්භ කරන්න අපි බලාපොරොත්තු වෙනවා.

ඒ නිසා වැඩකරන පන්තියට කම්කරු පන්තියට වගේම මුලුමහත් ජනතාවට ආදරයෙන් ගෞරවයෙන් ආයාචනය කරනවා අපේ ඒ අලූත් වැඩපිළිවෙළට එකතු වෙන්න කියලා. අද දවසේ ඔබ සමග එක්වීමට ලැබීම ගැන මම නැවතත් සතුට ප‍්‍රකාශ කරනවා. අද විශේෂයෙන්ම මේ මැයි රැළිය සාර්ථක කරන්න විශේෂයෙන්ම මඩකලපුව දිස්ත‍්‍රික්කයේ මැති ඇමතිවරු ඇතුලු අපට සහයෝගය දුන්න සියලූදෙනාට මම ස්තූතිවන්ත වෙනවා.

ලෝක කම්කරු දිනය සැමරීමේදි මේ රටේ පොදු මහජනතාව කම්කරු ජනතාව වෙනුවෙන් අපි කළ හැකි කළ යුතු සියලූ වගකීම් සහ යුතුකම් අවංකව කැපවීමෙන් පරිත්‍යාගශීලීව ඉටු කරන බව ප‍්‍රකාශ කරමින් ඔබ සියලූ දෙනාටම ජයවේවා කියා මම ඔබෙන් සමුගන්නවා.