• Thu. Feb 2nd, 2023

ගරාජයකට වැඩකළ දුප්පත් කොලූවා ලෝකයම හෙල්ලූ හැටි.

ලොව සුපතල හොන්ඩා රථවාහන බිහිකල සොයිචිරෝ හොන්ඩාගේ කතාව.

honda

‘හොන්ඩා’ ලෝකයේ පෙරලියක් කල නාමයක් ලෙස අද ලොව සියලූ දෙනා අතර ජනප්‍රියව පවතින නාමයකි.මෙකී හොන්ඩා සමාගමේ නිර්මාතෘ,වෙනත් අයුරකින් කියතොත් හොන්ඩා යතුරු පැදියේ නිර්මාතෘ වනුයේ 1906දී ජපානයේ කුඩා නගරයක උපත ලද සොයිචිරෝ හොන්ඩා යි. සොයිචිරෝ හොන්ඩා කුඩා කල සිටම යන්ත්‍ර,සූත්‍ර කෙරෙහි දැඩි ලෙස උනන්දුවක් දැක්වූ අයෙක් වුවත් පාසලේදී ඔහු ඉතා දුර්වල ශිෂ්‍යයෙක් බවටයි සඳහන් වනේ.
කෙසේ නමුත් හොන්ඩා තුල දැඩි උත්සාහයත් කැපවීමත් නොඅඩුව තිබුන බැවින් ඔහු නව යන්ත්‍ර සූත්‍ර සොයාගැනීම කෙරෙහි දැඩි උනන්දුවක් දැක්වූවා. ශරීර ශක්තියෙන් ස්වභාවිකවම අඩු පුද්ගලයකු වූ හොන්ඩා ඒ හේතුව නිසාම විවිධ අයගේ උසුළු විසුළු වලට පවා නොමඳව ලක්වුනා. ඔහු ඒ කිසි දෙයකින් සැලුනේ නෑ.

වරක් පිහිනීමට ආසාවක් ඇතිවුනු හොන්ඩා තමාට පිහිනීම උගන්වන ලෙස වැඩිහිටි ළමයකුට පවසන විට ඔහු හොන්ඩාට කියා සිටියේ පිහිනීම ඉතා පහසු කාර්යයක් බවත් ඒ සඳහා කලයුතු වන්නේ මෙඩෙකා නැමැති මාළුවකු ගිලීම පමණක් බවත්ය. මෙය විශ්වාස කල හොන්ඩා මෙඩෙකා මාළුවකු ගිල පසුව වතුරට පැන පිහිනීමට තැත් කලා. නමුත් එය අසාර්ථක වූ විට හොන්ඩා නැවතත් පෙර අවස්ථාවට වඩා විශාල මාළුවකු ගිල පිහිනීමට තැත් කලා. එවරත් එම උත්සාහය අසාර්ථක වුනා. ඔහු නැවත වරක් පිහිනනු වෙනුවට ජලයේ ගිලූණා. කෙසේ නමුත් උත්සාහය අත් නොහැරි හොන්ඩා අන් අය පිහිනන දෙස බලමින් පිහිනීමට තැත් කලා. කාලය ගතවත්ම ක්‍රමයෙන් හොන්ඩාට පිහිනීමට හැකියාව ලැබුනු අතර මෙය ඔහුට ඇදහිය නොහැකි ප්‍රාතිහාර්යයක් වුනා. නමුත් පසු කලෙක හොන්ඩා මේ පිළිබඳව පවසා තිබුනේ ප්‍රාතිහාර්යය පැවතියේ තමාගේ සිත තුලම බවයි.

කෙසේ නමුත් අවුරුදු පහළොවේදී හොන්ඩා ටෝකියෝ නගරයට පැමිණ ගරාජයක වැඩට එක් වුනා. ඒ තුලින් යන්ත්‍ර,සූත්‍ර පිළිබඳව මනා දැනුමක් ඔහුට ලැබුනු අතරම වයස අවුරුදු විස්සේදී ඔහු තමාගේම ගරාජයක් ආරම්භ කිරීමට ගමට පැමිණියා. තම පියාගේ කුඹුරේ වැඩ කටයුතුවලටත් සහාය වෙමින් හොන්ඩා විවිධ නව නිර්මාණ අත්හදා බැලූවා. අවුරුදු තිහේදී හොන්ඩා තමා නිපදවූ ලෝහවලින් සෑදූ ස්පෝක් ඇති රෝදයට පේටන්ට් අයිතිය ලබාගත්තා. පසුව ඔහු අලූත් පිස්ටන් වර්ගයක් නිපදවූ අතර ඒ සඳහා ඔහු කර්මාන්ත ශාලාවක්ද ආරම්භ කලා. නමුත් ටික කලකින් ඔහුගේ කර්මාන්තය පහළට ඇද වැටීමට පටන් ගත් අතර පිස්ටන් සෑදීමට තම දැනුම මඳ බව සිතූ හොන්ඩා ඒ පිළිබඳව වැඩිදුර ඉගෙනීමට විශ්වවිද්‍යාලයකට ඇතුලූ වුනා. පසුව නැවතත් තම පිස්ටන් වි‍යාපාරය දියුණු කර ගැනීමට හොන්ඩා සමත් වුවත්,දෙවන ලෝක යුද්ධයේදී ඇමරිකාව ජපානයට හෙලූ බෝම්බ වලින් හොන්ඩාගේ කර්මාන්තශාලා මහපොළොවට සමතලා වුනා.

Soichiro_Honda-Automotive-01

නමුත් කිසිවිටෙකත් හොන්ඩා පසුබට වූයේ නෑ. ලෝක යුද්ධයෙන් හෙම්බතව සිටි තම රටේ ජනයාට මෝටර් රථයක මිල දැරිය නොහැකි බව හොන්ඩා වටහා ගත්තා. ඒ ඔස්සේ තම නිර්මාණශීලී චින්තනට මෙහෙයවූ හොන්ඩා මෝටරයක් සවිකල බයිසිකලයක් නිපදවූවා. ඉන්පසු ක්‍රම ක්‍රමයෙන් එය දියුණු කල හොන්ඩා යතුරු පැදිය නිපදවීමට සමත් වුනා.

දිරිමත්ව,නොපසුබස්නාසුලූ උත්සාහයෙන් ජීවිතයට මුහුණ දුන් මේ මිනිසා අතින් වත්මන් ලෝකයට දායාද වී ඇති අපූර්ව වූ නිර්මාණයක් වූ හොන්ඩා යතුරු පැදියක් දුටු ඔබට කිසි දිනෙක එම යතුරු පැදිය පිටුපස ඇත්තේ මෙවන් වූ කතාවක් යැයි කෙදිනකවත් නොසිතෙන්න ඇති. හොන්ඩා තම ජීවිතයෙන් මුලූ ලොවටම අපූරු ආදර්ශයක් සපයනවා.

86ab41459f15e1ea619c864f464dcc2f“දෛවය අපට කොතෙකුත් සරදම් කරනු ඇත.නමුත් එයින් අධෛර්යයට පත්නොවී උත්සාහයෙන්, ධෛර්යයෙන් ජීවිතයට මුහුණ දෙන්නා ජීවිතය ජය ගනියි යනු එම ආදර්ශයයි..!

 

Leave a Reply

Your email address will not be published. Required fields are marked *