• Tue. Feb 7th, 2023

රාජපක්ෂලාට කඩේ යන අය රට පල්ලමට අදිනවා – අගමැති රනිල්

ranil Wickramasinghe

අශීලාචාරත්වයේ සිට සීලාචාරත්වය දක්වා රට මෙහෙයවමින් සිටින අවස්ථාවක ඊට අකමැති පිරිසක් ප්‍රතිවිප්ලවයක් ඔස්සේ රට නැවතත් අගාධයට ඇද දැමීමට කැසකවන බව අගමැති රනිල් වික්‍රමසිංහ පාර්ලිමේන්තුවේදී අද (9) පැවසීය.

ඉන්දියාව සමග පරිපූර්ණ ආර්ථික ඒකාබද්ධ ගිවිසුමක් (සීපා) අත්සන් කිරීමට යතියි රජයේ වෛද්‍ය නිලධරයන්ගේ සංගමයද අසත්‍ය හා පදනම් විරහිත ප්‍රකාශ කරමින් මහජනයා රැවටීම හෙළා දකින බවත් වික්‍රමසිංහ මහතා කීය.

වෛරී පාලනයක සිට මෛත්‍රී පාලනයක් දක්වා රට ගමන් කරවන බවත් රජය හැංගි හොරා වැඩ නොකරන බවත් රාජපක්ෂ රෙජීමය වෙනුවෙන් කඩේ ගිය සමහර දොස්තර මහත්වරුන්ට අවශ්‍යවී ඇත්තේ රටට බොරු කියමින් අවුල් ඇති කිරීම බවද අගමැති කීවේය.

‘‘රට අගාධයට ගෙන යමින් සිටි රාජපක්‍ෂ රෙජීමයේ පාලනය වෙනස් කිරීම සඳහා මෛත්‍රීපාල සිරිසේන මහතා පොදු අපේක්‍ෂකයා ලෙස නම් කිරීමෙන් අනතුරුව විවිධ වෘත්තිකයන්, තමන්ගේ රැකියාව පමණක් නොව ජීවිතයද පරදුවට තබා අප සමග මේ සටනට එක් වුණා. ඒ අතර වෛද්‍යවරුන් බොහෝ පිරිසක්ද සිටියා. බොහෝ තරුණ වෛද්‍යවරුන් පමණක් නොව, අත්දැකීම් සපිරි විශේෂඥ වෛද්‍යවරුන්ද අපට සහය දුන්නා.

නමුත් රජයේ වෛද්‍ය නිලධාරී සංගමයේ ඉහළ පුටු හොබවන දොස්තර පාදෙනිය ඇතුළු පිරිස ජනවාරි 08 වෙනිදා විප්ලවය වෙනුවෙන් පෙනී සිටියේ නෑ. ඔවුන් පෙනී සිටියේ රාජපක්‍ෂ රෙජීමය ආරක්‍ෂා කර ගැනීම සඳහායි. ඒ බව මුළු රටම දන්නවා.
ජනවාරි 08 වන දා විප්ලවය ජය ගැනීම සඳහා අප හා එක්වුණු වෘත්තීය කණ්ඩායම් සමග අප දීර්ඝ ලෙස සාකච්ඡා කළා. ඒ වන විට සීපා ගිවිසුම සඳහා රාජපක්‍ෂ ආණ්ඩුව එකඟ වී සිටියා. නමුත් සීපා ගිවිසුමේ යම් යම් කොන්දේසි නිසා ලාංකේය වෘත්තිකයන්ට අසාධාරණයක් වන බව අප එහිදී පෙන්වා දුන්නා. ඒ නිසා අප බලයට පත් වුණොත් සීපා ගිවිසුම අත්සන් නොකරන බවත්, ඒ වෙනුවට වෙනත් ගිවිසුමක් සකස් කරන බවත් අප ප්‍රකාශ කළා.

සීපා ගිවිසුම වෙනුවට ආර්ථික හා තාක්‍ෂණ ගිවිසුමක් අත්සන් කළ යුතු බවට අප තීරණය කළේ ඒ සාකච්ඡා වලදීයි.
ඉන්දීය අගමැති මෝදි මහතා ලංකාවට පැමිණි අවස්ථාවේදීත් අප මේ ගැන සාකච්ඡා පැවැත්වූවා. මගේ ඉන්දීය සංචාරයේදීත් අප මේ ගැන සාකච්ඡා කළා. අප එහිදී කියා සිටියේ අපේ ගිවිසුම භාණ්ඩ සහ තාක්‍ෂණ ක්ෂේත්‍ර සඳහා පමණක් විය යුතු බවයි. වෘත්තීය සේවාවන් සඳහා එය වලංගු නොවිය යුතු බව අපගේ මතය වුණා.

සේවක අර්ථසාධක අරමුදල සහ සේවක භාරකාර අරමුදල ඒකාබද්ධ කරන්නේ නැති බව මම මේ සභාවේදී ප්‍රකාශ කළා. එමෙන්ම ඒ අරමුදල් මහබැංකුවේ භාරයෙන් ඉවත් කරන්නේ නැති බවත් ප්‍රකාශ කළා.

සත්‍යය එයයි. නමුත් ඒ අරමුදල් එක් කරන බවටත්, මහ බැංකුවෙන් ඉවත් කරන බවටත් අසත්‍ය ප්‍රකාශ කරමින් ඔවුන් වර්ජනය කළා.
රජයේ සේවකයන්ගේ විශ්‍රාම වැටුප් අවලංගු කිරීමට හෝ වෙනස් කිරීමට රජය කිසිදු තීරණයක් ගෙන නැහැ. සත්‍යය එයයි. නමුත් විශ්‍රාම වැටුප් අවලංගු කරන බවට අසත්‍ය ප්‍රකාශ කරමින් ඔවුන් වර්ජනය කළා.

රජයේ සේවකයන්ට සහන පදනම මත ලැබෙන වාහන බලපත්‍ර අහෝසි නොකරන බව අප මේ පාර්ලිමේන්තුවේදී ප්‍රකාශ කළා. සත්‍යය එයයි. නමුත් වාහන බලපත්‍ර අහෝසි කරන බවට අසත්‍ය ප්‍රකාශ කරමින් ඔවුන් වර්ජනය කළා.

දැන් සීපා ගිවිසුම සම්බන්ධයෙනුත් ඔවුන් කරන්න යන්නේ ඒ දෙයමයි. දැන් සීපා ගිවිසුමක් නැහැ. සත්‍යය එයයි. නමුත් එහෙම එකක් තියෙනවා යැයි අසත්‍ය ප්‍රකාශ කරමින් ඔවුන් රට අවුලට පත් කරන්න උත්සාහ දරනවා.

රාජපක්‍ෂ රෙජීමය රජයේ සේවකයන්ගේ වාහන බලපත්‍ර නිකුත් කිරීම සම්පූර්ණයෙන්ම නවතා දැම්මා. ඒ, 2008 වසරේ මාර්තු 31 වන දා. එදා පටන් 2010 දෙසැම්බර 15 වන දා දක්වා මේ නියෝගය බල පැවැත්වුණා. හැබැයි ඒ අවස්ථාවේ නම් රජයේ වෛද්‍ය නිලධාරී සංගමය වර්ජන කරන්නට ගියේ නෑ.

රාජපක්‍ෂ රෙජීමයේ පීඩාකාරී පාලනය සහ අකාර්යක්‍ෂමතාව නිසා අපට ජීඑස්පී ප්ලස් සහනය නැති වුණා. ඒ අවස්ථාවේදීත් රජයේ වෛද්‍ය නිලධාරී සංගමය ප්‍රකාශ නිකුත් කළේ නෑ. වර්ජන කරන්නට ගියේ නෑ.

සුදු වෑන් සංස්කෘතියක් රට පුරා පැතිරුණා. මිනිස්සු අතුරුදහන් කෙරුණා. මහ මග මරා දැම්මා. හැබැයි ඒ අවස්ථාවේදීත් රජයේ වෛද්‍ය නිලධාරී සංගමය ප්‍රකාශ නිකුත් කළේ නෑ. වර්ජන කරන්නට ගියේ නෑ.

වැලිවේරියේ රතුපස්වලට වතුර ඉල්ලපු ජනතාවට වෙඩි තිබ්බා. සේවක අර්ථ සාධක අරමුදල් කොල්ලයට විරෝධය දක්වපු කටුනායක රොෂාන් චානක මරා දැම්මා. හැබැයි ඒ අවස්ථාවේදීත් රජයේ වෛද්‍ය නිලධාරී සංගමය වර්ජන කරන්නට ගියේ නෑ.

මේ ගරු සභාවට මම අවස්ථා ගණනාවකදී පෙන්වා දී තියෙන ආකාරයට අප ජනවාරි 08 වන දා ජයගත් විප්ලවය යළි පරාජය කරන්නට කිසිවෙකුට ඉඩ දෙන්නේ නෑ. ප්‍රතිවිප්ලවයට හිස ඔසවන්නට අප අවකාශ සලසන්නේ නෑ.

අප මේ පසු කරන්නේ සංක්‍රාන්ති සමයක්. අප මේ යන්නේ නව දේශපාලන ගමනක්. අප ක්‍රියාත්මක කරන්නේ මේ මුළු මහත් පාර්ලිමේන්තුවම ආණ්ඩු බලය සඳහා සම්බන්ධ කරගන්නා සම්මුතිවාදී ක්‍රමවේදයක්. මේ රට යළි ගොඩ නැංවිය හැක්කේ ඒ මාර්ගයෙන් පමණයි.

ඒ නිසා තම තමන්ගේ පටු අරමුණු පසෙකලා රට වෙනුවෙන් කටයුතු කිරීමට එක්වන ලෙස මම සියලු දෙනාගෙන්ම යළිත් ඉල්ලා සිටිනවා‘‘

Leave a Reply

Your email address will not be published. Required fields are marked *