• Sat. Jan 28th, 2023

පක්ෂ වශයෙන් බෙදුණත් ජයග්‍රහණයෙන් පසුව මහජනතාවට සේවය කිරීම වගකීමක්..! (VIDEO)

BySandun

Mar 28, 2018

පක්ෂ වශයෙන් බෙදී මැතිවරණවලට ඉදිරිපත් වුව ද, ජයග‍්‍රහණයෙන් පසුව මහජන සේවාව ඉටුකළ යුත්තේ දේශපාලන පක්ෂ බේදයෙන් තොරව බව ජනාධිපතිවරයා අවධාරණය කරයි.

ජනාධිපති මෛතී‍්‍රපාල සිරිසේන මහතා මේ බව අවධාරණය කළේ පසුගිය පළාත් පාලන මැතිවරණයෙන් පොළොන්නරුව දිස්ති‍්‍රක්කයේ පළාත් පාලන ආයතනවලට තේරි පත්වූ ශ‍්‍රී ලංකා නිදහස් පක්ෂ මන්තී‍්‍රවරුන් දිවුරුම් දීමේ අවස්ථාවට අද (26) පෙරවරුවේ පොළොන්නරුව රාජකීය ප‍්‍රාථමික විද්‍යාලයීය ශ‍්‍රවණාගාරයේදී එක්වෙමිනි.

මෙහිදි අදහස් දැක්වූ ජනාධිපතිතුමා වැඩිදුරටත් කියා සිටියේ කවුරුන් කෙසේ ජයග‍්‍රහණ පිළිබඳ උද්දාම වී කටයුතු කළ ද, පසුගිය පළාත් පාලන මැතිවරණයට තරග කළ කිසිදු දේශපාලන පක්ෂයකට, භාවිතා වූ ඡන්ද සංඛ්‍යාවෙන් සියයට 40 කට වැඩි ප‍්‍රතිශතයක් ලබාගැනීමට හැකියාවක් ලැබී නොමැති බවයි.

මෙම මැතිවරණය පාර්ලිමේන්තු මැතිවරණයක් වූවා නම් කිසිදු දේශපාලන පක්ෂයකට ආණ්ඩුවක් පිහිටුවීමේ බලය හිමිකර ගැනීමට අවකාශ නොමැති බව වාර්තා මඟින් පෙන්වා දෙන බව පැවසූ ජනාධිපතිවරයා ශ‍්‍රී ලංකා නිදහස් පක්ෂයට ලැබුණු ඡන්ද සංඛ්‍යාව සංසන්දනය කිරීමේදී ද වෙනත් කිසිදු දේශපාලන පක්ෂයකට ශ‍්‍රී ලංකා නිදහස් පක්ෂයේ සහය නොමැතිව ආණ්ඩුවක් පිහිටු විය නොහැකි බව ද කියා සිටියේය.

එබැවින් මෙම මැතිවරණ ප‍්‍රතිඵලය පිළිබඳ කිසිවෙකු නොසන්සුන් විය යුතු හෝ උද්දාමයට පත්විය යුතු නැති අතර, මෙම ප‍්‍රතිඵලය පදනම් කර ගනිමින් ශ‍්‍රී ලංකා නිදහස් පක්ෂය ජයග‍්‍රාහී දේශපාලන පක්ෂයක් ලෙස ඉදිරියට ගෙන ගොස් අනාගතයේදී පැහැදිලි ලෙසම ජයග‍්‍රහණය කරා යොමු කරන බව ජනාධිපතිවරයා මෙහිදී කියා සිටියේය.

ඒ සඳහා අවශ්‍ය සියලූ කටයුතු කිසිදු අඩුවකින් තොරව ඉටුකිරීමට පක්ෂ සභාපතිවරයා ලෙස කැපවන බව ද ජනාධිපතිවරයා වැඩිදුරටත් අවධාරණය කළේය.

මේ අතර යහපත් දේශපාලන සංස්කෘතියක් සඳහා විනයෙන් සහ හික්මීමෙන් යුතුව නව මන්තී‍්‍රවරු කටයුතු කිරීමේ අවශ්‍යතාවය ද පෙන්වා දුන් ජනාධිපතිවරයා තම වගකීම් ජනතාව වෙනුවෙන් නිසි ලෙස ඉටුකිරීමේ අවශ්‍යතාවයත්, එහිදී මතින් නිදහස් විනයගරුක පිරිසක් ලෙස කටයුතු කිරීමේ වැදගත්කමත් පෙන්වා දුන්නේය.

තමන්කඩුව නගර සභාව, තමන්කඩුව ප‍්‍රාදේශීය සභාව, දිඹුලාගල ප‍්‍රාදේශීය සභාව, වැලිකන්ද ප‍්‍රාදේශීය සභාව, හිඟුරක්ගොඩ ප‍්‍රාදේශීය සභාව, ලංකාපුර ප‍්‍රාදේශීය සභාව, මැදිරිගිරිය ප‍්‍රාදේශීය සභාව සහ ඇළහැර ප‍්‍රාදේශීය සභාව සඳහා තේරි පත්වූ නියෝජිතයෝ මෙහිදී දිවුරුම් දුන්හ.

මේ අතර නවක මන්තී‍්‍රවරුන් වෙනුවෙන් ,මහත්මා ගාන්ධි, කෘතිය සහ නෙල්සන් මැන්ඩෙලා ස්වයංචරිතාපදානය වූ ,ආදරණීය මැන්ඩෙලා, කෘතිය ජනාධිපතිතුමා අතින් පිළිගැන්විණි.

ප‍්‍රාදේශීය දේශපාලන නියෝජිතයේ ඇතුළු පිරිසක් මෙම අවස්ථාවට එක්ව සිටියහ.

Leave a Reply

Your email address will not be published. Required fields are marked *