මණ්ඩලෙන් අඩුවට ගන්න දීර්ඝ පොල් පෝලිම්..!

බත්තරමුල්ලේ පිහිටි පොල් වගා කිරීමේ මණ්ඩලයේට අයත් අලෙවි සැලකින් පොල් මිලදී ගැනීම සඳහා දීර්ඝ පෝලිම් දක්නට ලැබේ.

බත්තරමුල්ලේ පොල් වගා කිරීමේ මණ්ඩලයට අයත් කප්තුරුපාය අලෙවි සැලදී මෙසේ පොල් අඩු මිලට පාරිභෝගිකයන් වෙත නිකුත් කරයි.

සීමිත පොල් ගෙඩි ප්‍රමාණයක් අඩු මිලට නිකුත් කළද ඒවා ලබා ගැනීම සඳහා ජනතාව දීර්ඝ ලෙස පෝලිම්වල රැඳී සිටිනු දක්නට ලැබිනි.

මේ දිනවල සාමාන්‍ය වෙළඳපළේ පොල් අලෙවි වන්නේ ගෙඩියක් රුපියල් 200ක පමණ ඉහළ මිලකටයි.

පොල් හිඟයක් නෑ.. තියෙන්නේ මාෆියාවක්..!

රට තුළ පොල් හිඟයක් නොමැති බවත් වෙළඳපොලේ කෘත්‍රිම පොල් හිඟයක් ඇති කිරීමේ උත්සාහයක් පවතින බවත් වෙළඳ අමාත්‍ය වසන්ත සමරසිංහ මහතා පවසයි.

2024 වසරේ සමස්ත පොල් අස්වැන්න මිලියන 2,684 ක් වනු ඇතැයි අපේක්ෂා කරන අතර එය පසුගිය වසරට සාපේක්ෂව සියයට 14 ක අඩුවීමක් බවත් ඔහු පාර්ලිමේන්තුවේදී සදහන් කලේය.

වෙළෙඳපොළේ උග්‍ර පොල් හිඟයක් පවතින බවට ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ඩී වී චානක මහතා ඇසූ ප්‍රශ්නයකට පිළිතුරු දෙමින් ඇමැතිවරයා කියා සිටියේ වෙළෙඳපොළ තුළ පොල් මාෆියාවක් ඇති කිරීමේ උත්සාහයක් පවතින බවය.

රජය සතු වතුවල පොල් සතොස අලෙවිසැල් හරහා බෙදා හැරීමට රජය සැලසුම් කර ඇති බවත් කුරුණෑගල සහ හලාවත වතු මඟින් පොල් දස ලක්ෂයක් ලබා දෙන බවත් පොල් සංවර්ධන අධිකාරිය මඟින් ඉදිරි සති දෙක සඳහා පොල් ගෙඩි ලක්ෂ පහක් ලබාදීමට සූදානම් බවත් ඔහු පැවසීය.