පවතින අධික වැසි සහිත කාලගුණ තත්ත්වය හේතුවෙන් ගංගා රැසක් පිටාර ගලමින් ඇතිබව වාරිමාර්ග දෙපාර්තමේන්තුව පවසයි.
කැලනි ගඟ ,නිල්වලා ගඟ ,හැඩ ඔය,මාදුරු ඔය,මහ වැලි ගඟ සහ යාන් ඔයේ ජලමට්ටම් පිටාර මට්ටමට පැමිණ තිබේ.
ඒ අනුව කැලනි ගඟ නෝවුඩ් ප්‍රදේශයෙන් අවධානම් මට්ටමේ පවතියි.
නිල්වලා ගඟ තවදුරටත් තල්ගහගොඩ ප්‍රදේශයෙන් සුළු ගංවතුර මට්ටමේ පවතින අතර පානදුගම ප්‍රදේශයෙන් අවධානම් මට්ටමේ පවතියි.
හැඩ ඔය සියබලාන්ඩුව ප්‍රදේශයෙන් අවධානම් මට්ටම ඉක්මවා සුළු ගංවතුර මට්ටමට ආසන්න වෙමින් තිබේ.
වාරිමාර්ග දෙපාර්තමේන්තුව සඳහන් කර සිටියේ මාදුරු ඔය පදියතලාව ප්‍රදේශයෙන් මහා ගංවතුර මට්ටම ඉක්මවාගොස් ඇතිබවයි.
මහ වැලි ගඟ මේ වනවිට මනම්පිටිය ප්‍රදේශයෙන් සුළු ගංවතුර මට්ටම ඉක්මවාගොස් තිබේ.
පේරාදෙණිය ප්‍රදේශයෙන් මහ වැලි ගඟ සුළු ගංවතුර මට්ටමට ආසන්න වෙමින් ඇතිබව එම දෙපාර්තමේන්තුව පවසයි.
යාන් ඔය මේ වනවිට හොරොව්පතාන ප්‍රදේශයෙන් සුලු ගංවතුර මට්ටමට ආසන්න වෙමින් ඇතිබව වාරිමාර්ග දෙපාර්තමේන්තුව පවසයි.
තවදුරටත් ලැබෙන වැසි සමඟ ගංගා ජලමට්ටම් ඉහළ යමින් ඇතිබව වැඩිදුරටත් වාරිමාර්ග දෙපාර්තමේන්තුව පවසයි.
අම්පාරට 311.1mm වර්ෂාපතනයක්
අවසන් වූ පැය 24 තුළ දිවයිනේ වැඩිම වර්ෂාපතනය අම්පාර ප්‍රදේශයෙන් වාර්තා වන බව කාලගුණ විද්‍යා දෙපාර්තමේන්තුව පවසයි.
එම අගය මිලිමීටර් 311.1 කි.
එම කාලය තුල උල්හිටිය ප්‍රදේශයට මිලිමීටර් 286.6 වර්ෂාපතනයක් සහ සෝගම වැව ප්‍රදේශයට මිලිමීටර් 274 වර්ෂාපතනයක් ලැබී තිබේ.
එම කාලය තුළ අරලගංවිල ප්‍රදේශයට මිලිමීටර් 259.2 වර්ෂාපතනයක් ලැබී තිබේ.
එම කාලය තුළ දිවයිනේ බොහෝ ප්‍රදේශ වලට මිලිමීටර් 200 ඉක්මවූ ඉතා තද වර්ෂාපතනයන් ලැබී ඇතිබව කාලගුණ විද්‍යා දෙපාර්තමේන්තුව පවසයි.
– නාගොඩ සුමන උදයන්ත
– නාගොඩ සුමන උදයන්ත