වංචනික ටෙන්ඩර් ක්‍රියාවලියක් මඟින් රුපියල් ලක්ෂ 140ක් (මිලියන 14ක) මූල්‍ය වංචාවක් සිදු කර ඇති බවට විධිමත් පරීක්ෂණයක් අනුව තහවුරු වීමෙන් පසු ලංකා විදුලිබල මණ්ඩලයේ ඉහළ පෙළේ නිලධාරීන් දෙදෙනකු සේවයෙන් පහකර තවත් විෂමාචාරයකට හවුල් බවට චෝදනා එල්ල වූ නිලධාරිනියකගේ වැඩ තහනම් කිරීමට අධ්‍යක්ෂ මණ්ඩලය පියවර ගෙන තිබේ.
ලංකා විදුලිබල මණ්ඩලයේ අධ්‍යක්ෂ මණ්ඩලය පසුගියදා රැස්වී මේ තීරණය ගෙන ඇත.
වසර 2023 සිදු කර ඇති මෙම වංචනික ටෙන්ඩර් ක්‍රියාවලිය හරහා මුදල් වංචාවට සම්බන්ධ බවට තහවුරු වී ඇත්තේ ඉංජිනේරු නිශාන්ත පටබැඳිගේ නමැති නියෝජ්‍ය සාමාන්‍යාධිකාරිවරයායි. ඔහුට එරෙහිව චෝදනා 33ක් ගොනුකොට තිබූ අතර ඔහු ඉන් 31කට වරදකරු වී ඇත.
විදුලිබල මණ්ඩලයේ මාධ්‍ය කළමනාකරු වජිරපානි බණ්ඩාරනායක මහතාට චෝදනා 39ක් ඉදිරිපත් කොට තිබූ අතර ඔහු ඉන් 34කට වරදකරු වී තිබේ. මේ අනුව ඔවුන් දෙදෙනා සේවයෙන් පහකිරීමට අධ්‍යක්ෂ මණ්ඩලය තීරණය කර ඇත.
එමෙන්ම වාහන අවභාවිතාවකට හා අර්ථසාධක අරමුදලින් ලබාගත් ණය මුදලකට අදාළව සිදුකොට ඇති මූල්‍ය විෂමාචාර චෝදනාවට ලක්වූ අතිරේක මුදල් කළමනාකාරිනී ගණකාධිකාරි තුෂාරි ත්‍රීමවිතාන මහත්මිය වැඩ තහනමකට ලක් කිරීමට ද පියවර ගෙන ඇත.
මෙම තීරණය ගෙන තිබෙණුයේ විදුලිබල මණ්ඩලයේ විශේෂ විමර්ශන ඒකකය මඟින් ඇයට එරෙහිව සිදු කළ මූලික විමර්ශනයකින් පසුවය.
මෙම තීරණ ගැනීමට එහි අධ්‍යක්ෂ මණ්ඩලය පසුගියදා කටයුතු කළේ විශේෂ විමර්ශන ඒකකයේ නිරීක්ෂණ සලකා බලමිනි.
– ජයසිරි මුණසිංහ